«Ղարաբաղը Պիտի Ըլլայ Հայերու Գերեզմանը» Արտայայտութեան Համար Հոլանտայի Մէջ Իլհամ Աշքընը Դատապարտուեցաւ

tadaranՀոլանտայի դատարանը մեղաւոր ճանչցաւ հայերու նկատմամբ զանգուածային բռնութեան կոչով հանդէս եկած Հաագայի Թուրք-­ատրպէյճանական մշակութային միութեան նախագահ Իլհամ Աշքընը: Ան թրքական հանրահաւաքի ժամանակ վանկարկած էր «Ղարաբաղը պիտի ըլլայ հայերու գերեզմանը»: Այս մասին՝ ըստ «Արմենփրես»-­ի՝ ըսած է ՀՅԴ Հոլանտայի Հայ Դատի յանձնախումբի նախագահ Մասիս Աբրահամեանը:

«Մեր ներկայացուցիչը դատարան է: Քիչ առաջ մեզի տեղեկացուց, որ դատարանը բաւարարած է մեղադրող կողմին պահանջքը: Աւելին` դատարանը որոշած է հարկադիր աշխատանքային 120 ժամ նախապէս ներկայացուած 80 ժամի փոխարէն: Պայմանական բանտարկութիւնը նոյնպէս աւելի վճռուած է: Երկուքի փոխարէն չորս շաբաթ` երկու տարի պայմանական ժամկէտով: Դատական վճռի մանրամասնութիւնները պիտի ներկայացնենք աւելի ուշ: Այս պահուն կրնանք ըսել, որ սա կարեւոր որոշում է: Դատապարտումը կը նշանակէ, որ հայերու նկատմամբ զանգուածային բռնութիւններու կոչ ընող ինչ­որ մէկը անպատիժ չի մնար»,­ ըսած է Մասիս Աբրահամեան:

Հոլանտահայ կազմակերպութիւններու համադաշնակցութենէն յայտնած են, որ Աշքին կը մեղադրուի հայերուն դէմ բռնութիւն եւ ատելութիւն սերմանելու մէջ, քանի որ ան Ալմելօ քաղաքին մէջ` Մեծ եղեռնի յուշահամալիրին դիմաց կազմակերպուած թրքական հանրահաւաքին ընթացքին ըսած է. «Ղարաբաղը պիտի ըլլայ հայերուն գերեզմանը»:

1 Յունիս 2014-ին, Ալմելոյի մէջ տեղի ունեցած էր հանրահաւաք, որուն հիմնականին մէջ մասնակցած են թուրքեր, եւ որ ուղղուած էր Ալմելոյի Հայ առաքելական եկեղեցւոյ հողատարածքին վրայ տեղադրուած Հայոց ցեղասպանութեան զոհերու յուշահամալիրին դէմ: Հոլանտահայ կազմակերպութիւնները, մասնաւորապէս Հոլանտահայ կազմակերպութիւններու համադաշնակցութիւնը եւ Հոլանտայի Հայ դատի յանձնախումբը, գանգատ ներկայացուցած էին հանրահաւաքին ընթացքին կատարուած հակահայ յայտարարութիւններուն դէմ:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS