Թուրք Պաշտօնեան Յայտարարած է, Որ Պիտի Մորթէ Իր Հոլանտական Ցեղատեսակի Կովը` Ի Նշան Բողոքի

holstein2Սթամպուլի Պեշիկթաշի շրջանի ղեկավարի տեղակալ Հուսէյն Աւնի Սիփահին քաղաքային խորհուրդի այսօրուան նիստին յայտարարած է, որ խորհուրդի նախագահի պահանջքով իր ամառանոցին մէջ գտնուող հոլանտական ցեղատեսակի կովերէն մէկը պիտի մորթէ` ի նշան Հոլանտայի մէջ թուրք նախարարներու ելոյթները արգիլելու դէմ բողոքի:

ինչպէս կը յայտնէ «Թերթ»-ը՝ վկայակոչելով թրքական t24.com.tr կայքը` պաշտօնեան նշած է, որ թէեւ ան պատրաստ է մորթելու կովը, սակայն կոչ ըրած է խորհուրդի անդամներուն լուծումներ փնտռելու Հոլանտայի հետ յարաբերութիւնները կարգաւորելու համար:

«Երբ մեր նախարարները որեւէ վտանգ չէին ներկայացներ շրջապատի համար, զանոնք երկրէն վտարելը պարզապէս չեմ կրնար ընդունիլ: Ես Էմիրլի մէջ գտնուոց իմ հողատարածքիս մէջ ունիմ հոլանտական ցեղատեսակի կով: Շատ ալ կաթ կու տայ: Խորհուրդի նախագահը ասաւ մորթենք կովը: Մինչեւ ամառ պիտի մորթենք: Կովեր դարձեալ կ՛առնենք, բայց Հոլանտայի հետ յարաբերութիւնները եթէ չվերականգնուին` կրնանք դժուար վիճակի մէջ յայտնուիլ, ինչպէս Ռուսիոյ հետ եղաւ», – յայտարարած է Սիփահին:

Յիշեցնենք, որ Մարտ 11-ին Հոլանտայի վարչապետը թոյլ չէր տուած, որպէսզի Թուրքիոյ արտաքին գործոց նախարար Մեւլութ Չաւուշօղլուի օդանաւը վայրէջք կատարէ Ռոթըրտամ, ուր ան մտադրած էր Թուրքիոյ մէջ կայանալիք սահմանադրական բարեփոխումներու հանրաքուէի թեմայով հանրահաւաք ունենալ տեղի թուրքերուն հետ:

Յայտնի է, որ նոյն նպատակով, սակայն արդէն ցամաքային ճանապարհով, Հոլանտա մեկնած էր Թուրքիոյ ընտանիքի հարցերով նախարար Ֆաթմա Պեթիւլ Սայան Կայան, որուն մեքենան կանգնեուցած են Ներքին գործոց նախարարութեան աշխատակիցները` թոյլ չտալով առաջ երթալ: Այնուհետեւ Հոլանտայի իշխանութիւնները զայն «անցանկալի անձ» յայտարարած ու արտաքսած են երկրէն:

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS