Բաց Նամակ՝ Արսինէ Խանճեանին

13996158_10154245248525351_4381563541907080672_o

Սիրելի վաստակաշատ դերասան,

Այսօր առաւօտ «Ռատիօ Սեւան»-էն կոչ ուղղեցիք, որ սփիւռքահայերը այսուհետեւ չօժանդակեն Հայաստանին եւ փոխարէնը՝ զօրակցին այսպէս կոչուած ժողովրդային շարժումներուն։

«Հայաստան» համահայկական հիմնադրամին ճամբով հայրենիքին տրամադրուած օժանդակութիւններուն իրագործումները արդէն իսկ երեխաները անգամ տեսնելու կարողութիւնը ունին, մինչ դուք չէք ուզեր իրականութեան հետ հաշտուիլ։ Սփիւռքը երէկ, այսօր եւ վաղը պիտի օժանդակէ Հայաստանին, պարտաւոր է օժանդակել Հայաստանին, ով որ ալ ըլլայ նախագահը, վարչապետը, ոստիկանապետը․․․

Իսկ «ժողովրդային շարժումներ»ուն գծով, ի՞նչ կ՛ուզէք, որ սփիւռքը ընէ․․․ Գաղութներուն մէջ ալ կ’ուզէք տեսնել բախումնե՞ր, հակադրութիւննե՞ր, անկայունութի՞ւն, իրարանցո՞ւմ․․․ Այդ բոլորը ձեր երազներուն մէջ անգամ չէք տեսներ․․․ Սփիւռքին համար ՀԱՅԱՍՏԱՆԸ ԱՄԷՆ ԲԱՆԷ ՎԵՐ Է։

Դուք արդէն սկսած էք խօսիլ ուրիշներուն խօսածները, մինչ արուեստագէտն ու մտաւորականը պէտք է ունենայ իր դիմագիծը եւ իւրայատկութիւնները։ Դուք կ’ըսէք, որ եթէ կուսակցութիւնները դերակատար չըլլան, ապա ցանցերը կրնան դերը ստանձնել։ Սա ընկերային ցանցերը ի՞նչ պիտի ընեն․․․ Սուրիոյ, Իրաքի, Եգիպտոսի եւ այլ երկիրներու մէջ պատահած իրադրութիւնները կ՛ուզէ՞ք, որ կրկնուին Հայաստանի մէջ ու եղածն ալ կորսնցնե՞նք։ Երբե՛ք։

Աւելի լաւ է, որ ամէն մէկը իր չափն ու սահմանը գիտնայ, ամէն մէկը յարգէ կարմիր գիծերը․․․Ձեր այս խօսքերը միմիայն ի սպաս կը ծառայեն սփիւռքի պառակտման փորձերուն, Հայաստանի անվտանգութեան քայքայման եւ Հայ Դատի գործընթացի կասեցման։

Այո՛, անցեալին կը հաւատայի, որ դուք Հայ Դատի նուիրուեալ զինուոր էք, եւ երբեք չէի ուզեր, որ այդ պատկերը փոխուի։ Այսօր ձեր արտայայտութիւնները ամէնէն առաջ կը հարուածեն Հայ Դատի գործունէութեան, ա՛յն աշխատանքներուն, որոնց ջատագովն էիք երէկ․․․

Դուք դերասան էք։ Մնացէք համախմբողի ձեր դերակատարութեան մէջ, որովհետեւ այս թատրոնի բեմադրիչներուն նպատակները ոչ իմ, ոչ ձեր եւ ոչ ալ մեր հայրենիքի հայորդիներուն նպատակներն են։ Դուք ուրիշ դեր պէտք չէ վերցնէք, եւ դեռ ուշ չէ․․․

Յարգանօք՝
Րաֆֆի Տ․

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS