Ի Պատիւ Սուրիահայ Զինուորին

հալէպ

Բերիոյ Հայոց Թեմի Առաջնորդ Գերշ․ Տ․ Շահան Սրբ․ Արք․ Սարգիսեանի հովանաւորութեամբ, թեմի Նպաստից Յանձնախումբը սուրիական բանակին մէջ ծառայող հայ զինուորները գնահատելու գեղեցիկ մտայղացումը ունեցեր էր, կը գրէ “Գանձասար”-ը։

Նախաձեռնութիւնը առիթ մըն էր յարգանքի եւ բարոյական զօրակցութեան արտայայտութիւն մը դրսեւորելու, զանոնք հրաւիրելով հաւաքի մը, որուն ընթացքին գնահատանքի, քաջալերանքի խօսքերու կողքին, աղօթքի եւ պահպանութեան խնդրանքներով մեր համայնքի սէրը արտայայտելու անոնց հանդէպ։

Սուրիահայ զինուորներու եւ անոնք ծնողաց ներկայութեան, Առաջնորդ Սրբազան Հօր նախագահութեամբ,Նպաստից Յանձնախումբի անունով բարի գալստեան իր խօսքէն ետք, Կայծակ Յովակիմեան անդրադարձաւ հաւաքի նպատակին եւ Մայիս 28-ի խորհուրդին։

Այնուհետեւ Առաջնորդ Սրբազան Հայրը իր սրտի խօսքը արտասանեց, ընդգծելով, որ մեր համայնքի քաջասիրտ զաւակները ի սկզբանէ իրենց կեանքը ընծայաբերած են Սուրիական Հայրենիքին եւ երկրի դրօշին ներքեւ ծառայած անոր սահմաններու պաշտպանութեան համար։

Ներկաները միասնաբար աղօթեցին։ Ձեռնարկը իր աւարտին հասաւ «Պահպանիչ» աղօթքով։
Այս առիթով Նպաստից Յանձնախումբին կողմէ պատրաստուած նիւթական նուէրներ բաշխուեցան հարիւր յիսուն զինուորներու։

Յետ միջօրէի ժամը 2։00-ին Առաջնորդ Սրբազան Հօր հովանաւորութեամբ եւ ներկայութեամբ, Բերիոյ Հայոց Թեմի Նպաստից Յանձնախումբին կազմակերպութեամբ, Ս․ Աստուածածին եկեղեցւոյ ներքնասրահէն ներս տեղի ունեցաւ Սուրիոյ բանակի նահատակ զինուորներու հոգեհանգստեան աղօթք եւ ապա անոնց ծնողներուն հետ միասին հոգեճաշ։

13319960_864637006971660_2665839827952003387_n

13254309_864636910305003_6614446616330849811_n

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS